قصة سيدنا آدم وحواء بعد الهبوط الي الارض
السلام
عليكم ورحمة الله وبركاته
اليوم
هنكمل قصة سيدنا آدم وقفنا في الحلقة الرابعة عند هبوط سيدنا آدم وحواء الي الأرض
وإبليس ،
وإبليس ذريته ليختبروا بني آدم،
وكان فيه سؤال آخر الحلقة اللي فاتت وهو ،
هل البشر ممكن يعيشون علي كوكب تاني غير الأرض ؟الاجابة : لا يمكن
السبب : لان ربنا قال ( فيها تحيون وفيها تموتون ومنها تخرجون )
وقال ( ولكم في الارض مستقر ومتاع الي حين )
وممكن الانسان ينزل علي كوكب تاني لكن انه يستقر فيه ويكون مثل الأرض في الحياة والتكاثر .. مستحيل
كيف بدأ الخلق يتكاثروا ؟
كانت حواء بتولد في كل بطن أو في كل مرة توأم ولد وبنت،
فالولد من البطن الأولى يتزوج من البنت في البطن الثانية ،
والبنت من البطن الأولى تتزوج من الولد إللي هييجي من البطن الثانية وهكذا
وكان حرام إن الولد والبنت في البطن الواحدة يتزوجوا من بعض ،
ويُقال إن حواء ولدت ٤٠ بطن يعني حوالي ٨٠ ذكر وأنثى كلهم تزوجوا من بعض ،
ودي كانت بداية نسل البشر على الأرض،
وتذكروا ان ذريته مختلفة الألوان ومتعددة الطباع ،
لأنه خلق من أنحاء الأرض لان التراب جمع من كل بقاع الأرض .
المهم آدم عليه السلام كان بيعلم أبناؤه الدين وبيعلمهم من هو الله وطبعا بيحذرهم من إبليس ،
آدم كان بشر وعنده أبناء زينا كده بالضبط ،
حاولوا تتخيلوا الصورة معايا أب مع أبناؤه بيحبهم بيلعب معاهم ويعلمهم ويراعيهم ..
ماهي قصة قابيل وهابيل ؟
قابيل وهابيل ليسوا انبياء ولكن قصتهم مهمة .
كان من أبناء آدم عليه السلام قابيل وهابيل،
اتولد مع قابيل أخت جميلة ، واتولد مع هابيل أخت أقل جمالا من أخت قابيل،
فالطبيعي زي ما قلنا إن قابيل يتزوج أخت هابيل ،
وهابيل يتزوج أخت قابيل ، هو ده الشرع عندهم في زمنهم .
لكن قابيل اعترض وكان أكبر في السن من هابيل ،
وقال لين ياخد أخت هابيل الأقل جمالا وهابيل ياخد أخته الجميلة .
فكان عايز ياخد أخته لنفسه ويتزوجها هو ،
طب إزاي يابني وكده حرام ودا شرع ربنا
برده صمم علي الحرام وزي ما بتنصح الناس بالصح ويفضلوا مصممين على الغلط وراكبين دماغهم ،
حتى سيدنا آدم عليه السلام أمره إنه يزوج أخته لهابيل
ومع ذلك برده مفيش نتيجة ،
طيب ايه الحل ؟
نرجع لربنا وهو يحكم في الموضوع
"فَإِنْ تَنَازَعْتُمْ فِي شَيْءٍ فَرُدُّوهُ إِلَى اللَّهِ وَالرَّسُول."
ربنا هدى آدم عليه السلام لفكرة وهي إن كل واحد منهم يقدم قربان لله،
قربان يعني حاجة يتقرب بيها إلى الله، وإللي ربنا هيتقبل قربانه هو إللي هيتزوج أخت قابيل،
"وَاتْلُ عَلَيْهِمْ نَبَأَ ابْنَيْ آدَمَ بِالْحَقِّ إِذْ قَرَّبَا قُرْبَانًا"
هابيل كان بيشتغل في الرعي ، وقابيل كان بيشتغل في الزراعة،
هابيل دور على أحسن وأسمن كبش عنده عشان يقربه لربنا،
وقابيل دور على أسوأ حاجة من الزرع عنده عنده وقربها لربنا،
فربنا تقبل قربان هابيل،
ماهي علامة قبول القربان ؟
وكانت علامة قبول القربان أن تنزل نار من السماء تحرق القربان ده ،
وبكده عرفنا مين إللي هيتزوج أخت قابيل.
"فَتُقُبِّلَ مِنْ أَحَدِهِمَا وَلَمْ يُتَقَبَّلْ مِنَ الْآخَرِ."
# وقفة مهمة جدا هنا
هابيل كان عايز حاجة ربنا يحققها له وقابيل كان عايز نفس الحاجة ،
لكن كل واحد فيهم قدم إللي عنده على حسب الصدق إللي في قلبه،
- هابيل ضحى بأغلى حاجة عنده عشان يتقرب لربنا بيها،
وقابيل جاب أسوأ حاجة عنده مع إن هو كان عنده مجال يجيب برده أفضل حاجة...لكن معملش كده،
السؤال هنا : هل إحنا عايشين حياتنا زي هابيل ولا زي قابيل؟
هل إحنا بنضحي بأغلى حاجة عندنا في سبيل رضا ربنا،
ولا على حسب الظروف ؟
يعني ظروفي تسمح كان بها مسمحتش خلاص مش هقطع نفسي يعني .
هل بنستقطع من وقتنا المزحوم بأشياء ممكن تكون عادية عشان نقرأ قرآن ؟
هل ضحينا بإننا نترك معصية بنعملها باستمرار مرضاة لله وتقربا إليه ؟
ولا بندور على العبادات إللي بتيجي على مزاجنا وسهلة إننا نعملها مادام مفيهاش تضحية ؟
كلنا نفسنا ندخل الجنة لكن قدمنا إيه قربان عشان ربنا يرضى علينا ويدخلنا الجنة .
فيه ناس هتقول احنا هندخل الجنة برحمة ربنا مش بعملنا
ودا صح هندخل الجنة برحمة ربنا ولكن زي ما قلنا قبل كده ، رسول الله صلى الله عليه وسلم يقول:
"اعملوا فكل مُيسّر لما خُلق له"
إسأل نفسك كده ..
هل أنا زي هابيل ولا زي قابيل؟
نرجع لموضوعنا ..
ربنا هو اللي حكم واختار وهو احكم الحاكمين .. ربنا تقبل من هابيل ..
طيب ايه رد فعل قابيل ؟
لم يرضَ قابيل ورفض حكم ربنا ،
وقال لآدم ربنا تقبل من هابيل عشان إنت دعيتله إن ربنا يتقبل منه ومدعتليش
يعني هو مش شايف غلطه خالص وتقصيره وبيلقي اللوم ويعلق أخطاؤه على حد تاني .. ابوه ابو الأنبياء
وغضب قابيل وقال لهابيل ساقتلك، كان يتوعده بالقتل،
"قَالَ لَأَقْتُلَنَّكَ"
فقال هابيل:
" قَالَ إِنَّمَا يَتَقَبَّلُ اللَّهُ مِنَ الْمُتَّقِينَ"
وكأن لسان حال هابيل يقول في رسالة لكل إنسان حاله زي حال قابيل :
" أنا ذنبي إيه تقتلني "
هل ذنبي إني اتقيت ربنا وعملت إللي يرضيه عني، بتلومني عشان إنت فشلت ترضي ربنا،
طيب ليه لم تتق الله من الأول قبل ما تضيع منك الفرصة،
ليه متصلحش من نفسك ،
يعني هي المشكلة إني انا موجود !!!
يعني لو أنا مش موجود ربنا كان هيتقبل منك؟
النتيجة كانت هتكون زي ما هي لأن المشكلة عندك إنت مش عندي ،
والمفروض بدل ما تلومني الأَوْلى إنك تصلح غلطك وتتعلم من أخطائك،
" وَجّه طاقتك إنك تبني نفسك بدل ما تلوم إللي حواليك "
لكن للأسف الرسالة لم يستوعبها قابيل،
لكن لعل حد تاني يستوعبها فالسعيد من وُعظ بغيره .
فلما شاف هابيل إن مفيش نتيجة راح مذكّره برابط الأخوة اللي بينهم ،
اللي المفروض تكون سبب في التسامح والتجاوز عن الأخطاء ،
" لَئِن بَسَطتَ إِلَيَّ يَدَكَ لِتَقْتُلَنِي مَا أَنَا بِبَاسِطٍ يَدِيَ إِلَيْكَ لِأَقْتُلَكَ ۖ إِنِّي أَخَافُ اللَّهَ رَبَّ الْعَالَمِينَ "
فقاله لو إنت اعتديت عليّ بالقتل ظلما وحسدا فأنا مش هعاملك بالمثل ،
لأني أخاف الله وأكره إن ربنا يراني قاتل لأخي ..
إزاي أكون السبب في قتل أخي .. إزاي أعُق والديّ وأزعلهم ، مفيش نتيجة برده وقابيل مصمم على قتل هابيل ،
هابيل استعمل آخر حاجة عنده وهو التخويف من الله ومن ناره ومن سوء المصير...
" إِنِّي أُرِيدُ أَن تَبُوءَ بِإِثْمِي وَإِثْمِكَ فَتَكُونَ مِنْ أَصْحَابِ النَّارِ "
# منفعش الترغيب، الإستعطاف او الترهيب ..
وكان هابيل عبدا صالحا وأقوي من قابيل في البنية الجسدية ،
وكان يقدر يقتل قابيل لو اراد بس مرضيش لانه يخاف الله، وفضل يكون عبد الله المقتول وليس القاتل .
# وهنا كيف قتل قابيل اخوه هابيل ؟
في يوم كان هابيل نايم في المرعي ورآه قابيل والحسد ملأ قلبه ،
فاتي بصخرة كبيرة - في بعض الاقوال - ورماها علي رأس هابيل فقتله .
( فَطَوَّعَتْ لَهُ نَفْسُهُ قَتْلَ أَخِيهِ فَقَتَلَهُ فَأَصْبَحَ مِنَ الْخَاسِرِينَ )
- خسر اخوه وخسر السند وخسر آخرته بعقوقه لابويه
- خسر وارتكب اشد جريمة علي وجه الأرض وهي القتل
- قابيل لم يتصور انه لما يكبر ممكن يقتل اخوه ،
لكن الحسد والغيرة والغضب ممكن يجعلو الانسان يعمل حاجات عمره ما يتخيلها .
والحسد هو تمني زوال النعمة من الغير
وهو أول معصية عُصي الله بها في الارض وكانت سببا في قتل نفس بغير حق ،
الحسد ياكل القلب ويفسد دين الانسان وآخرته .
- ماذا تفعل لو حسيت بغيرة في قلبك او حسد تجاه أي انسان ؟
يجب ان يدفع الانسان الحسد والغيرة من قلبه بأن يدعو للشخص بالبركة وربنا يرزقه من فضله ،
ويستعيذ بالله من الشيطان ويدعي ربنا يطهر قلبه .
ماذا فعل قابيل بعد ان قتل هابيل واين ذهب ؟
ماذا فعل آدم بعد وفاة هابيل ؟
ماذا فعل آدم مع ملك الموت ؟
ما هو الفرق بين النبي والرسول ؟
كم عدد الانبياء والرسل ؟
ومن هو أول نبي بعد آدم عليه السلام؟
ومن هو أول رسول من الرسل ؟
مدون مصري مهتم بالعمل علي الانترنت وأقدم في مدونتي بداية فكرة للتغيير والمدونة تشمل موضوعات اسلامية قصص الانبياء وقصص الصحابة والسيرة النبوية وسيرة زوجات النبي ومنشورات تعليمية متنوعة للثانوية العامة وتعليم المحاسبة وتحميل الألعاب والبرامج للكمبيوتر والهاتف وتحميل الكتب ونتائج الإمتحانات والوظائف وتسويق المنتجات
ليست هناك تعليقات:
إرسال تعليق