قصة سيدنا ابراهيم
إيه القصة إللي حصلت مع هاجر وسارة وإبراهيم عليهم السلام بعد ما راحوا فلسطين ؟
كنا واقفين عند إبراهيم عليه السلام لما خرج من مصر ومعاه سارة وهاجر
وراحوا لفلسطين
كان إبراهيم عليه السلام كَبُر في السن ومكنش عنده أولاد فتمنى إنه يكون
عنده ولد ،
فدعا ربنا إنه يرزقه طفل وكانت سارة عقيم لا تلد،
"رَبِّ
هَبْ لِي مِنَ الصَّالِحِينَ * فَبَشَّرْنَاهُ بِغُلَامٍ حَلِيمٍ "
فوهبت سارة لإبراهيم عليه السلام هاجر وبقت ملك يمين، وملك
اليمين زيها زي الزوجة من ناحية المعاشرة،
فحملت هاجر .. وولدت
إسماعيل عليه السلام ، وطبعا كأي أب إبراهيم عليه السلام اتعلق بإسماعيل،
وكمان هنا الوضع مختلف لأن الولد جه لأب كبير في السن،
وكان أول خلفته ولد فأكيد الإهتمام هيكون مضاعف.. فهنا سارة غارت
مع
إنها هي إللي وهبت هاجر لإبراهيم عليه السلام عشان تخلف له ولد، لكن طبيعة
النساء تغلب
يعني غيرة المرأة من الزوجة التانية دي حاجة طبيعية
لا تُحاسب عليها
إلا إذا المرأة تعدت بسبب الغيرة وظلمت أختها
فتغتابها أو تطلب من زوجها إنه يطلقها أو إنها تكيد ليها مكائد،
فالغيرة مادامت في القلب ومدفعتش المرأة لإرتكاب أي محرم فالمرأة لا تُحاسب
على الغيرة دي
ولو بصينا لسارة هنلاقي إن من حقها فعلا
تغير في موقف زي ده ،
إنتم متخلين زوجة مرت مع زوجها بأحداث كتير
وعاشت معاه سنين طويلة وده مش أي زوج ده إبراهيم خليل الله
فربنا
رأفة بسارة أمر إبراهيم عليه السلام إنه ياخد هاجر وابنها الرضيع إسماعيل
ويوديهم مكان تاني وهو مكة،
خدوا بالكم إن ربنا لما يريد شيء بيهيء
له أسباب
بمعنى إن بعدين ربنا هيأمر إبراهيم وإسماعيل عليهما السلام إنهم يبنوا
البيت الحرام،
طيب هيبنوه إزاي وهم أصلا قاعدين في فلسطين والبيت
الحرام هيكون في مكة ؟
وكمان ساعتها مكة كانت صحراء ومكنش في
حد عايش هناك ولا كان في زمزم لسه ولا كان في أي حاجة.. فإزاي بقى؟
فبتقدير من ربنا سارة غارت ، وبالتالي ربنا أمر إبراهيم عليه
السلام إنه يأخذ هاجر وإسماعيل لمكة عشان يهيء الأسباب إن البيت الحرام
يتبنى
وإنتوا كمان متزعلوش لما تدعو دعوة وتتأخر أو أي حاجة
وحشة تحصل.. متزعلوش لانكم متعرفوش الخير فين،
مش يمكن ربنا بيهيأ
الأسباب عشان يحققلك اللي نفسك فيه وأحسن كمان ؟
مش يمكن ربنا
قدر الحاجة اللي إنت شايفاها وحشة دي دلوقتي عشان يمنع عنك كارثة في
المستقبل ؟
اعرف كويس أوي إن تقدير ربنا ليك داااايما خير بس إنت
خليك واثق فيه واحسن الظن بالله .
إبراهيم عليه السلام أخذ هاجر
وإسماعيل وسافروا لمكة عند البيت الحرام ،
ومكنش لسه اتبنى وكان أرض
صحراء، ساب لها قربة ماء وجراب فيه تمر يعني نقدر نقول إزازة مية وكيس تمر،
وبعدين سابهم ومشي، فهي استغربت .. وقعدت تنادي عليه :
يا إبراهيم اإنت سايبنا لمين هنا وماشي ؟
وهو مش بيبص لها ومش
بيرد ومكمل مشي ..
وهي تنادي عليه وتكرر نفس السؤال .. فهي حست إن في
حاجة،
فسألته : هو ربنا اللي أمرك بكده ؟
فالْتَفَت وقال
نعم .. فقالت بكل ثقة : إذاً لن يضيعنا
يعني مادام ربنا إللي
أمر وقدر كده يبقى أمره وقدره خيييير
دايما قولها لنفسك كل ما
تحصلك مشكلة.. كل ما تتأخر عنك دعوة .. كل ما يشتد عليك البلاء..
قول
مش ده قدر ربنا يبقى ربنا مش هيضيعني
بس خد بالك بقى ،
متكونش إنت سبب في اللي بيحصلك وترمي بلاك على قدر ربنا
يعني
ميكونش عندك امتحانات ومذاكرتش وتحل وحش وتقول قدر ربنا كله خير
لا
ياحلو لازم تاخد بالأسباب .. لما تاخد بالأسباب وتذاكر هتنجح ..
لما
تاخد بالأسباب وتعمل الصالحات هتدخل الجنة..
طيب عملت اللي عليك فعلا
وربنا قدر حاجة تاني ؟
يبقى هنا ربنا يريد ليك أمر تاني .. فهنا نقول
قدر ربنا أكيد خير
بعد ما إبراهيم عليه السلام مشي بعيد عنهم
رفع إيده للسماء ،
وقال يارب أنا تركت أهلي في مكان مفهوش زرع عند
بيتك المحرم فاجعل بعض عبادك يروحوا يسكنوا معاهم .
"رَبَّنَا
إِنِّي أَسْكَنْتُ مِنْ ذُرِّيَّتِي بِوَادٍ غَيْرِ ذِي زَرْعٍ عِنْدَ
بَيْتِكَ الْمُحَرَّمِ رَبَّنَا لِيُقِيمُوا الصَّلَاةَ ،
فَاجْعَلْ
أَفْئِدَةً مِنَ النَّاسِ تَهْوِي إِلَيْهِمْ وَارْزُقْهُمْ مِنَ
الثَّمَرَاتِ لَعَلَّهُمْ يَشْكُرُونَ"
كانت هاجر بتاكل من
التمر وتشرب من الماء اللي كان معاها وترضع إسماعيل،
لحد ما المياه
والتمر خلصوا واللبن في صدرها جف،
وكان إسماعيل بيبكي من الجوع ..
فهي مقدرتش تستحمل إنها تشوفه كده وهي مش قادرة تعمل حاجة..
أم لطفل
رضيع ابنها بيبكي جعان وهي مش قادرة تعمل حاجة ..
ومع ذلك قامت تدور
على أي حاجة .. أكل أو مياه أو أي إنسان
فطلعت على جبل
الصفا فملقتش حاجة وطلعت على جبل المروة ملقتش حاجة ،
فضلت تطلع
وتنزل من الجبل ده للجبل ده .. امرأة جعانة ..عطشانة.. مرهقة.. ابنها بيعيط
من الجوع
وفي وسط كل الأزمات دي تبص على إسماعيل عليه
السلام فتلاقي المياه بتطلع من عند رجله،
وكان جبريل عليه السلام كان
قد ضرب الأرض بطرف جناحه فطلع الماء،
فلما شافت الماء قعدت
تحوط عليه بإيديها وتقول زم زم ،
عشان كده اتسمى الماء بزمزم ،
وبقت تاخد من المية تحط في القِربة إللي كانت معاها والمياه عمالة تفور،
وبدأت الطيور تتجمع لأن الطيور بتيجي على المكان اللي فيه ماء،
في الوقت ده كان في قبيلة من جُرْهم معدية من المكان فشافوا
الطيور ،
وقالوا أكيد في مياه في المكان ده خلونا نروح نشوف
وقبيلة
جُرهم دي من العرب العاربة يعني العرب إللي بيتكلموا اللغة العربية ..
فالعرب قبل إسماعيل عليه السلام إسمهم العرب العاربة ،
وكان منهم قبائل كثير زي عاد وثمود ومدين اللي قلنا على أنبياؤهم قبل
كده إنهم عرب
فاكرين لما قلنا إن هود وصالح وشعيب عليهم السلام
كانوا عرب
كان من القبائل العربية دي قبيلة جُرْهم إللي كانت
معدية وقت فوران ماء زمزم ،
فلما وصلوا عند هاجر وإسماعيل وشافوا
المياه قالوا لها:
ممكن نسكن في المكان هنا معاكِ ؟
قالت
لهم ماشي بس الماء ده بتاعي ملكوش حق فيه
قالوا :أكيد
فبعتوا
بقى جابوا أهلهم واستقروا في مكة عند بئر زمزم.
بدأ إسماعيل عليه السلام يكبر ويتعلم منهم اللغة العربية ،
وكان هو
أول من نطق باللغة العربية الفصحى المعروفة إللي نزل بيها القرآن،
والعرب ورثوا الفصاحة عن إسماعيل عليه السلام
فالعرب اللي جم بعد كده من ذرية إسماعيل عليه السلام ومنهم محمد صلى
الله عليه وسلم اسمهم العرب المستعربة،
لأنهم اتعلموا اللسان العربي
من قبيلة جرهم .
بالنسبة لإبراهيم عليه السلام كان بيتكلم
باللغة الآرامية
أو السريانية وهي لغة بين اللغة العربية القديمة
واللغة العربية بتاعتنا إللي إحنا عارفينها .. لغة القرآن
وبالمناسبة
اللغة العبرية بتاعة اليهود هي فرع من فروع اللغة العربية القديمة
وباذن
الله سنكمل الحلقة القادمة قصة سيدنا ابراهيم عليه السلام مع سيدنا اسماعيل
.
روابط السلسلة :
مدون مصري مهتم بالعمل علي الانترنت وأقدم في مدونتي بداية فكرة للتغيير والمدونة تشمل موضوعات اسلامية قصص الانبياء وقصص الصحابة والسيرة النبوية وسيرة زوجات النبي ومنشورات تعليمية متنوعة للثانوية العامة وتعليم المحاسبة وتحميل الألعاب والبرامج للكمبيوتر والهاتف وتحميل الكتب ونتائج الإمتحانات والوظائف وتسويق المنتجات
ليست هناك تعليقات:
إرسال تعليق