قصة سيدنا ابراهيم واسماعيل عليهما السلام
كان إبراهيم عليه السلام بيجي يزور هاجر وإسماعيل عليه السلام كل فترة وقيل كل شهر،
وكان إبراهيم عليه السلام يحب إسماعيل لأنه كان ولده الوحيد ساعتها ،
وكان ابنه البكر وكمان اتولد بعد زمن طويل فكان له مكانة عظيمة في قلبه،لكن إبراهيم عليه السلام كان خليل الله
والخِلة دي منزلة عظيمة لازم يكون فيها القلب فاضي من حب كل شيء إلا حب الله ..
عشان كده ربنا ابتلى إبراهيم ابتلاء عظيم جدا
ربنا أراد أن يختبر إبراهيم عليه السلام في صدق محبته لله ومين اللي في قلب إبراهيم عليه السلام حبه أكبر ..
وهل هيقدم حبه لابنه على أوامر الله ولا هيعمل العكس ؟
طبعا إحنا عارفين إن رؤيا الأنبياء وحي
فرأى إبراهيم عليه السلام رؤيا إنه بيذبح ابنه
"فَلَمَّا بَلَغَ مَعَهُ السَّعْيَ قَالَ يَابُنَيَّ إِنِّي أَرَى فِي الْمَنَامِ أَنِّي أَذْبَحُكَ"
طبعا ده معناه إن ربنا بيأمره إنه يذبح ابنه
متخيلين الصدمة اللي إبراهيم عليه السلام فيها
ده إحنا بيجيلنا الأمر من ربنا في حاجات بسيطة جدا ومع ذلك بنحس إنها تقيلة ،
وبنقول مش قادرين وبنقعد ندور على أعذار
ده جاله الأمر بذبح ابنه البكر الوحيد إللي اتولد له بعد ٨٤ سنة
يعني مش إن ابنه هيموت لأ ده إنت اللي هتذبحه يا إبراهيم بإيديك
طيب هيعمل إيه ويتصرف إزاي
إبراهيم عليه السلام لأنه يعلم علم اليقين إن ابنه ده مش بتاعه وإن ربنا هو اللي رزقه بيه،
سلم الأمر لله بكل رضا وطمأنينة و بدون أي انزعاج، وراح لإسماعيل عليه السلام وأخبره بالموضوع،
"فَانْظُرْ مَاذَا تَرَى"
وكان ساعتها إسماعيل كبر وبقى يعتمد على نفسه ويشوف مصالحه،
وإبراهيم عليه السلام بيعلمنا منهج تربوي مع عيالنا وهو إننا نستشيرهم في الأمور اللي تخصهم ..
إبراهيم عليه السلام مرحش خد إسماعيل عليه وذبحه وخلاص انتهى الموضوع
مع إن ده أمر إلهي مفيش فيه أي مجال للعصيان ومع ذلك أشركه معاه في الموضوع لأنها حاجة خاصة بيه،
وكمان عشان يشرك ابنه معاه في اجر الصبر والإحتساب
فمتقولش لعيالك إعمل اللي بقولك عليه وخلاص
متقررش عن عيالك كل أمورهم من غير ما تاخد رأيهم،
طبعا لو رأيهم غلط توضح الصح إيه لكن متخليهمش معتمدين عليكِ في كل حاجة
فإسماعيل عليه السلام رد بكل صبر واستسلام لله
قال: يا أبتِ افعل ما تؤمر ستجدني إن شاء الله من الصابرين،
وهنا إسماعيل عليه السلام استعان بربنا
مقلش انا أدها وأقدر أستحمل واعتمد على قوته .. لأ ..
ده قال إن شاء الله عشان ربنا يثبته على البلاء العظيم ده،
فتقبل أمر ربنا بكل صبر ويقين
فلما خلاص حطه على وشه وأخفى إسماعيل عليه السلام وشه عشان أبوه متتغلبش عليه الشفقة فيتراجع عن الذبح،
" قَالَ يَاأَبَتِ افْعَلْ مَا تُؤْمَرُ سَتَجِدُنِي إِنْ شَاءَ اللَّهُ مِنَ الصَّابِرِينَ * فَلَمَّا أَسْلَمَا وَتَلَّهُ لِلْجَبِينِ "
متخيلين أب ماسك في إيده سكينة ..
الابن قاعد في الأرض مستسلم تماما للذبح وفعلا يبدأ إبراهيم بذبح ابنه لكن السكين لم تقطع
زي النار التي لم تحرق ..فالأشياء ملهاش القدرة بذاتها ولكن بأمر الله وبس
إبراهيم عليه السلام استغرب السكين مش راضية تذبح
وإسماعيل عليه السلام مستني آخر لحظات حياته وحاسس بالسكين بتتحرك على رقبته
بس مفيش ألم إيه الحكاية
وفي اللحظة دي يسمعوا منادي بينادي ....
وليه السكين مذبحتش إسماعيل عليه السلام؟
ده إللي هنعرفه المرة الجاية إن شاء الله
روابط السلسلة :
مدون مصري مهتم بالعمل علي الانترنت وأقدم في مدونتي بداية فكرة للتغيير والمدونة تشمل موضوعات اسلامية قصص الانبياء وقصص الصحابة والسيرة النبوية وسيرة زوجات النبي ومنشورات تعليمية متنوعة للثانوية العامة وتعليم المحاسبة وتحميل الألعاب والبرامج للكمبيوتر والهاتف وتحميل الكتب ونتائج الإمتحانات والوظائف وتسويق المنتجات
ليست هناك تعليقات:
إرسال تعليق